Penyanyi Sensasi Iban, Jeffrey Nyaloi udah nadai

Penyanyi Sensasi Iban, Jeffrey Nyaloi udah nadai kena 29/04/2011, jam 1.30 pagi tu tadi. Niang deka disenggai ba TR Limai, Labang, Bintulu.

Biodata

Jeffrey Nyaloi, siku pemerindang ti ukai iya jauh di teluk din tang semampai semak belama laban sada nyawa iya semampai didinga ba radio ari kelia-lia. Jeffrey Nyaloi, ukai nama ke rapas ba dunya pemerindang laban iya lama udah makai garam lalu dulu lama udah nemu reti dunya pemerindang enti dibandingka enggau raban pemerindang ke baru-baru diatu. Kebuah pia laban Jeffrey mula ngerikod lagu dalam taun 1989 suba.

Sebedau mansai penemu enggau runding iya senentang dunya pemerindang, manah kitai dulu bekelala enggau penanyi ti udah bulih gelar Artis Pemadu Tebilang ba pekit Lagu Tebilang Iban ti digaga Miri FM empai lama ti udah. Lagu ti ngenyit ngangkatka nama Jeffrey Nyaloi ba pekit nya iya nya lagu iya ti diberi nama ‘Kaul Tua Kelia’.

Jeffrey Nyaloi tauka suah agi dikangauka bala bakih iya ngena nama ‘Loi’ aja tu peranak asal menua ke dikumbai Labang, pelilih Sebauh, Bintulu. Nya alai dipelabaka kami Jeffrey Nyaloi tu mayuh pekara ditemu, mayuh penau pasal pekara menua ulu tauka rumah panjai. Nyangka nya mega siti ari kebuah leka lagu ti digaga iya enda sengapa tang nyengala mai reti, ngembuan empas sereta tempias ke bebatang laban jaku ke dikena iya ukai jaku pasar, ukai jaku tempa sengapa tang jaku Iban ke chulin.

Keterubah iya ngindik sekula menya ba SK. Nanga Sengian lalu udah nya iya nampung pelajar ngagai SMK Sebauh sebedau masuk besekula ba SMK Bintulu nyentuk ngagai pom 5. Anak ke-6 ari tujuh iku diri menyadi tu enda sunyi maya ti diau di rumah laban anak iya dua iku enggau indai tuai bisi merindang ati. Nya nandaka ruang bilik ti lantang senang nadai penimpang. Amat mih enda kaya raja tang ati semampai gaga nguan menua netap ba Bintulu.

Nyangka amat jaku tuai ti madahka labang apai labang ga anak laban penau Jeffrey nebah nyawa endang lilih ari apai iya empu iya nya siku ari Lemambang ti tebilang ba menua sida. Dipelabaka ngapa, Jeffrey tentu mega bisi penau ba main asal Iban baka mengap, bepantun tauka beramban. Enti enda nemu mayuh, enda patut ke ungkup diri dikena betundi maya begelumu pan nadai.

Taja pan Jeffrey suah enggau bepekit belagu kenyau ari umur enam taun tang karrier iya nyadi pemerindang nelesak maya iya nyau udah bujang, bepun ari keterubah iya bekelala enggau siku penanyi tebilang 80an suba iya nya Zamry Amera. Maya ti begulai enggau Zamry Amera, nyangka ketegal siku nya tetarit enggau penau Jeffrey nebah nyawa, ba taun 1989 iya lalu diasuh Zamry Amera ngerekod lagu ba baruh payung Syarikat Sri Saribas enggau album iya ti keterubah iya nya ‘Mabuk Pengerindu’.

- Diambi ari Blog Jeffery Nyaloi http://jeffreynyaloi.wordpress.com